Моҳи апрел интихоботи миёнадаврӣ баргузор мегардад

10 апрели соли равон дар ду ҳавзаи интихоботии кишвар -ҳавзаи интихоботии Фирдавсӣ №1 ва Ҷаббор Расулов №16 интихоботи миёнадаврии вакилони Маҷлиси намояндагони Маҷлиси Олии Ҷумҳурии Тоҷикистон ба ҷойи вакилони хориҷшуда баргузор мегардад. Дар ин росто бо қарори Комиссияи марказии интихобот ва раъйпурсии кишвар барои гузаронидани интихоботи миёнадаврии вакилони Маҷлиси намояндагон ҳавзаҳои интихоботӣ ташкил шуданд.

Бояд зикр кард, ки дар интихоботи парлумонии соли 2015 аз ҳавзаҳои интихоботии Фирдавсӣ №1 ва Ҷаббор Расулов №16 Маҳмадалӣ Ватанзода ва Комил Салимзода ба ҳайси вакилони Маҷлиси намояндагон интихоб гардида буданд. Моҳи январи соли равон Маҳмадалӣ Ватанзода бо Фармони Президенти кишвар ёрдамчии Президенти Ҷумҳурии Тоҷикистон оид ба масъалаҳои ҳуқуқӣ-намояндаи комилҳуқуқи Президенти Ҷумҳурии Тоҷикистон дар Маҷлиси Олии Ҷумҳурии Тоҷикистон таъйин гардид.