Иди Рӯзи Ғалаба муборак, ҳамватанони азиз!
Имрӯз дар сар то сари ҷаҳони мутамаддин иди Рӯзи Ғалабаи халқи советӣ бар Германияи гитлериро ҷашн мегиранд. Дар ҳамин рӯз расо шасту нуҳ сол муқаддам Ливои зафар ба лонаи фашистон Рейхстаг афрошта шуд. Ин ғалаба ба осонӣ ба даст наомада буд. Ҳамаи халқҳои Иттиҳоди Шӯравӣ дар он саҳим буданд.
Азҷумла дар ин пирӯзӣ саҳми падару бобоёни мо тоҷикон ва тоҷикистониён кам нест. Садҳо ҳазор нафар тоҷикистониён ҷони худро барои ҳарчи тезтар фаро расидани ин рӯзи муборак қурбон кардаанд. Месазад, ки дар ин рӯзи фаромӯшнашаванда хотираи неки ҳамаи шаҳидони Ҷанги Бузурги Ватаниро гиромӣ дошта барои шод кардани арвоҳашон оёте чанде аз Каломуллоҳи шариф қироат намоем ва аз Худованди бузург талаб кунем, ки руҳи онҳоро шоду хонаи охираташонро обод бигардонад.
Худованд ҳамаи он иштирокчиёни Ҷанги Бузурги Ватаниро, ки дар қайди ҳаётанд ва тамоми онҳоеро, ки дар он рӯзҳои мудҳиш дар ақибгоҳ барои Ғалаба ҷонбозиҳо карданд ва имрӯз дар паҳлӯи мо давлати пирӣ меронанд, дар паноҳи исматаш нигаҳбон бошад. Парвардигоро, Ватани мо ва мардуми шарифи онро ва умуман тамоми ҷаҳон ва халқи онро аз офатҳои заминиву осмонӣ, аз ҷумла аз ҷангҳои хонумонсӯз, ҳифз намо.
Аҳли эҷоди сомона ва ҳафтаномаи «Рӯзгор»