Ройзании фарҳангии Эрон озмуни нав эълон кард

Ройзании фарҳангии сафорати Ҷумҳуриии Исломии Эрон дар Тоҷикистон аз эълони озмуни мақолоти беҳтарин ба муносибати бузургдошти Саъдии Шерозӣ хабар дод. Ройзанӣ аз ҳама хоҳишмандон хостааст мақолоти худро дар ин мавзуъҳо ба суроғаи шаҳри Душанбе, хиёбони Рӯдакӣ 130 (дафтари ройзанӣ) ирсол кунанд:

1.Таъсири андешаҳои пешиниён бар Саъдии Шерозӣ;

2.Низомияи Бағдод ва Шероз аз манзари Шайх Саъдӣ;

3.Талмеҳ аз оёти Қуръон ва суханони Паёмбар (с) дар осори Саъдӣ;

4.Тарҷумаи осори Саъдӣ дар Ғарб ва таъсири ӯ бар шоирон ва нависандагони мағрибзамин;

5.Таъсири андеша ва осори шайх Саъдӣ дар Русия ва Осиёи Миёна;

6.Тафовут дар мазмун ва муҳтавои ғазалҳои Саъдӣ ва Мавлоно;

7.Таъсири афкор ва андешаҳои Саъдӣ бар шоирони муосири Эрон ва Тоҷикистон;

8.Монандиҳои забони Саъдӣ бо забон ва лаҳҷаи мардуми Тоҷикистон;

9.Баҳсу мунозираи ҷомеаи имрӯз роҷеъ ба дидгоҳҳои Саъдӣ дар сомонаҳои иҷтимоӣ ва хусусӣ;

10.Дидгоҳҳои ҳикамӣ, таълимӣ ва ахлоқии Саъдӣ барои насли ҷавони имрӯз.

Ғолибон дар нишасти илмӣ-фарҳангие ба хотири бузургдошти Саъдии Шерозӣ, ки 21 апрели соли равон дар гӯшаи фарҳанги Эрон, воқеъ дар Китобхонаи миллии Тоҷикистон баргузар мешавад, эълон хоҳанд шуд.