Дар Теҳрон табодули таҷриба байни мутахассисони соҳаи тибби Тоҷикистон ва Эрон баррасӣ гардид

Сафири Фавқулода ва Мухтори Ҷумҳурии Тоҷикистон дар Ҷумҳурии Исломии Эрон Низомиддин Зоҳидӣ бо муовини Вазири беҳдошт, дармон ва омӯзиши пизишкии Эрон Сайид Саҷҷод Разавӣ мулоқот намуд.

Тавре ба мо аз Сафорати Ҷумҳурии Тоҷикистон дар Ҷумҳурии Исломии Эрон хабар доданд, зимни мулоқот масъалаҳои тақвияти ҳамкорӣ дар соҳаи тандурустӣ ва дорусозӣ, табодули таҷриба байни мутахассисони соҳаи тибби ду мамлакат, танзими гардишгарии тиббӣ ва такмили асноди танзимкунандаи робитаҳои соҳавӣ мавриди баррасӣ қарор гирифтанд.

Ҷонибҳо барои густариши минбаъдаи муносибатҳои дӯстона ва ҳамкории судманди соҳавӣ байни Тоҷикистону Эрон изҳори омодагӣ карданд.

АМИТ «Ховар»