Чӣ тавр кӯдакро аз зуком ва бемориҳои мавсимӣ муҳофизат кунем?

Тирамоҳ ва зимистон фасли авҷгирии бемориҳои сироятии роҳҳои нафас ва зуком (грипп) ба шумор мераванд. Аксари волидон гумон мекунанд, ки роҳи ягонаи муҳофизат — ин додани доруву витаминҳои гуногун аст. Аммо педиатрҳо таъкид мекунанд, ки пешгирии табиӣ ва дуруст хеле самараноктар мебошад.

Инҳо тавсияҳои асосии табибони кӯдакона барои муҳофизати фарзандони шумо:

1. Ҳавои хонаро тоза ва намнок нигоҳ доред

Вирусҳо дар ҳавои хушк ва гармии хона хеле тез паҳн мешаванд.

- Ҳар рӯз ҳатмӣ 2-3 маротиба тирезаҳоро кушода, ҳавои хонаро шамол диҳед (дар ин вақт кӯдакро ба хонаи дигар баред).

- Дар хона тозакунии намиро (влажная уборка) анҷом диҳед. Агар ҳавои хона хушк бошад, пардаҳои биниву гулӯи кӯдак хушк шуда, вирусҳоро зуд мезананд.

2. Қоидаи тиллоӣ: Шӯстани дастҳо

Аксари вирусҳо на танҳо аз ҳаво, балки тавассути дастҳо ва бозичаҳо ба организм ворид мешаванд.

- Кӯдакро одат кунонед, ки баъд аз омадан аз кӯча, боғча ё мактаб ва пеш аз хӯрокхӯрӣ дастҳояшро бо собун камаш 20 сония шӯяд.

- Дар кӯча ва нақлиёт ба кӯдак фаҳмонед, ки бо дастҳои ношуста чашму биниашро ламс накунад.

3. Нам кардани луобпардаи бинӣ (Нос)

Бинӣ — дарвозаи асосӣ барои вирусҳост. Вақте ки луобпардаи бинӣ тар аст, вай худаш вирусҳоро нест мекунад.

- Пеш аз ба кӯча баромадан ё баъд аз омадан, бинии кӯдакро бо маҳлулҳои намакӣ (ба мисли физраствор ё Аквамарис) бишӯед ё нам кунед. Ин усули оддӣ хатари бемориро то 50% кам мекунад.

4. Ғизои бовитамин ва хоби кофӣ

Масунияти кӯдак дар ошхона ва ҳангоми хоб ташаккул меёбад.

- Дар менюи кӯдак супи гарм, маҳсулоти ширӣ (ҷурғот, кефир), меваҷот (себ, анор, лимон) ва сабзавотро зиёд кунед.

- Кӯдакони боғчаву мактабӣ бояд камаш 9-10 соат дар як шабонарӯз хоб кунанд. Хастагӣ масуниятро заиф месозад.

5. Сайругашт дар ҳавои тоза

Гарм печондани кӯдак ва дар хонаи маҳкам нигоҳ доштани ӯ хатост.

- Ҳатто дар рӯзҳои сард ҳам кӯдакро мувофиқи ҳаво либос пӯшонида, камаш 1 соат дар ҳавои тоза сайр кунонед. Ҳавои кушод бар зидди вирусҳо беҳтарин давост.

ТАЪКИДИ МУҲИМ: Хатои асосии волидон — Антибиотикҳо!

Педиатрҳо огоҳ мекунанд: Зуком ва шамолхӯриро вирусҳо ба вуҷуд меоранд, на бактерияҳо. Антибиотикҳо бар зидди вирусҳо ҳеҷ таъсире надоранд!

Истифодаи худсаронаи антибиотикҳо бе тавсияи табиб масунияти кӯдакро тамоман заиф мекунад ва ба меъдаву рӯдаи ӯ зарари ҷиддӣ мерасонад.

Агар кӯдак бемор шавад, ба ӯ моеъи гарм (чойи камранг, компоти меваҳои хушк) зиёд диҳед ва ҳатман ба табиби кӯдакона (педиатр) муроҷиат намоед.

Фарзандони шумо ҳамеша солим ва хонадони шумо обод бошад!

“Рӯзгор”