ДИДОРИ РАҲБАРОНИ ЧАҲОР КИШВАР

Мулоқоти чаҳорҷонибаи раҳбарони Тоҷикистон, Покистон, Афғонистон ва Русия дар Душанбе бо имзои эъломияе муштарак поён ёфт. Раҳбарони ин чаҳор кишвар мулоқоти худ дар Душанберо барои ёфтани роҳҳои ҳалли масоили амниятӣ ва дастёбӣ ба субот ва пешрафти иқтисодию тиҷоратӣ дар минтақа бисёр муҳимм хондаанд.

Чолишҳои амниятӣ, аз ҷумла даргириҳо бо гурӯҳҳои шӯришии Толибон дар Афғонистон ва Покистон ва эҳтимоли тавсеъаи доманаи ноамниҳо ба Тоҷикистон ва кишварҳои дигари Осиёи Миёна ва ҳамчунин қочоқи маводди мухаддир аз нигарониҳои умдаи ҳар чаҳор кишвар аст. Қабл аз ин мулоқот, Осиф Алӣ Зардорӣ ва Дмитрий Медведев, раисони ҷумҳурии Покистон ва Русия, дидоре пушти дарҳои баста анҷом доданд.

Ҳануз мушаххас нест, ки дар дидори оқоён Медведев ва Зардорӣ чи мавзӯъоте баррасӣ шуда, вале бархе соҳибназарон баррасии масоили амниятӣ ва ҳамкориҳои энержиро барои ин ду кишвар бештар ҳоизи аҳаммият медонанд.

Раиси ҷумҳурии Покистон, ки дидоре расмӣ аз Тоҷикистон анҷом медиҳад, қабл аз зуҳр дар дидоре сеҷониба бо раҳбарони Тоҷикистону Афғонистон масоили амниятии минтақа ва иҷрои тарҳҳои муштараки энержӣ ва иртибототро баррасӣ кард.

Сарони ин се кишвар пеш аз зуҳр эъломияи муштараке интишор доданд ва дар он омодагии худро барои тасреъи иҷрои як тарҳи кашидани хутути интиқоли нерӯи барқ, ки се кишварро ба ҳам муттасил мекунад, иброз карданд.

Русия низ, бо таваҷҷуҳ ба тарҳҳои энержие, ки дар Тоҷикистон ба иҷро мерасонад, монанди эҳдоси нерӯгоҳи Сангтуда-1, зоҳиран ба иҷрои ин тарҳ ва имкони фурӯши нерӯи барқ ба Афғонистону Покистон дар оянда таваҷҷуҳ дорад.

Би-Би-Си