"ДАҲ ХАБАРИ РӮЗ" | 11 июли соли 2026

Қазоқистон дар моҳи май 7 тонна тилло харид ва ба ҷои 4-уми ҷаҳон баромад

Тибқи маълумоти Шӯрои Ҷаҳонии Тилло, Қазоқистон дар моҳи май захираҳои тиллои худро 7 тонна зиёд кард. Аз оғози соли 2026, ин кишвар 20 тонна тилло харида, дар байни харидорони бузурги тилло дар ҷаҳон ба ҷойи 4-ум баромад. Лаҳистон бо 64 тонна дар ҷойи аввал, Ӯзбекистон 33 тонна ва Чин 25 тонна дар ҷойҳои дуюм ва сеюм қарор доранд. 

Ӯзбекистон ва Беларус робитаҳои худро ба сатҳи шарикии стратегӣ боло бардоштанд

Дар натиҷаи сафари расмии Президенти Ӯзбекистон Шавкат Мирзиёев ба Минск, ду кишвар Эъломияи таъсиси Шарикии Стратегиро ба имзо расониданд. Ҳаҷми савдои ду кишвар дар 5 соли охир се баробар афзуда, ба наздикии 1 миллиард доллар расидааст ва теъдоди корхонаҳои муштарак ба 360 расидааст. Ин қадам бахше аз стратегияи Ӯзбекистон барои гуногунсозии шарикони иқтисодӣ ва коҳиши вобастагӣ ба як манбаъ мебошад. 

Бӯҳрони сӯзишворӣ баъди ҳамла ба пӯлодгоҳи Омск

Ҳамлаи дронҳои Украина ба пӯлодгоҳи Омски Русия, ки яке аз бузургтарин корхонаҳои коркарди нафт дар ин кишвар бо иқтидори солонаи 22 миллион тонна мебошад, боиси вайрон шудани занҷири таъминоти сӯзишворӣ ба кишварҳои Осиёи Марказӣ гардид. Тоҷикистону Қирғизистон, ки тақрибан 80-95% маҳсулоти нафтии худро аз Русия мегиранд, ба ҳолати фавқулодда дучор шуданд.

Бори дуюм дар як ҳафта системаи барқ пурра аз кор монд

Системаи миллии барқи Куба рӯзи 10 июл соати 16:30 ба вақти маҳаллӣ пурра фурӯпошид. Ин дуюмин бор дар тӯли як ҳафта аст, ки тамоми кишвар бидуни барқ мемонад. Ҳукуматчииён ба норасоии сӯзишворӣ ва таҷҳизот дар натиҷаи таҳримҳои ИМА ишора мекунанд.

Дар оташи бузурги ҷангал дар Андалусия 11 нафар кушта шуданд

Оташи бузург, ки рӯзи 10 июл дар ҷануби Испания сар зад, дасти кам 11 нафарро кушта ва 19 нафарро бедарак гардонд. Ин ҳодиса ба гуфтаи мақомот "бузургтарин фоҷиаи оташсӯзӣ дар таърихи Андалусия" номида шудааст. Дар миёни кушташудагон шаҳрвандони Бритониё, Белгия ва Испания ҳастанд.

Трамп аз идомаи музокирот хабар дод, оташбас қатъ шуд

Президенти ИМА Доналд Трамп гуфт, ки ба идомаи музокирот бо Эрон розӣ шудааст, аммо оташбас "тамоман ба охир расидааст". Вай дар шабакаи иҷтимоӣ навишт, ки Эрон хоҳони идомаи "гуфтушунид" аст. Даври нави музокирот ҳафтаи оянда дар Швейтсария баргузор мешавад.

Ҳамлаҳои "муаммоӣ" ба Эрон пас аз анҷоми амалиёти ИМА

Пас аз он ки ИМА эълон кард, ки амалиёти ҳавоии худро ба анҷом расондааст, як силсила ҳамлаҳои дигар дар Эрон сурат гирифт, ки то ҳол ҳеҷ гурӯҳе масъулияти онро ба ӯҳда нагирифтааст. Як вакили парлумони Эрон ба Имороти Муттаҳидаи Араб дар бораи "пардохти баҳо" барои дастгирии ИМА ҳушдор дод.

Исроил фаъолиятро дар Лубнон маҳдуд кард

Тибқи гузориши телевизиони давлатии Исроил, роҳбарии сиёсӣ ба артиш дастур додааст, ки дар ҷануби Лубнон амалиёти "ғайриоддӣ" анҷом надиҳад. Ин тасмим пас аз дархости ИМА гирифта шудааст. Исроил инчунин омода аст, ки дар сурати ҳамлаи Эрон, ба ин кишвар зарбаҳои шадид расонад.

Тайфуни "Бави" ба соҳили шарқии Чин наздик мешавад

Тайфуни "Бави", ба соҳили ҷанубу шарқии Чин наздик шудааст. Вилоятҳои Чжэцзян ва Фуҷиан сатҳи вокунишро ба сатҳи II боло бардоштанд. Тайфун эҳтимолан дар наздикии марзи ду вилоят ба хушкӣ мерасад.

WFP барномаи аввалини амали пешгирикунандаи хушксолиро дар Судан Ҷанубӣ оғоз кард

Барномаи Ҷаҳонии Ғизо (WFP) дар ҳамкорӣ бо ҳукумати Судан Ҷанубӣ барномаи пешгирикунандаи хушксолиро оғоз кард. Ин ташаббус ба беш аз 65,000 нафар дар иёлати Шарқии Экватория кӯмак расонида, пеш аз бадтар шудани шароити хушксолӣ ба онҳо кӯмаки пулӣ мерасонад.

“Рӯзгор”