ТАҶЛИЛ АЗ 12-УМИН СОЛГАРДИ РӮЗИ ВАҲДАТ

Маросими асосии таҷлил аз 12-умин солгарди Рӯзи ваҳдати миллӣ ва истиқрори сулҳ дар шаҳри Хуҷанд баргузор мешавад. Ҷашнвора дар варзишгоҳи тозабунёди шаҳри Хуҷанд соати 20.00 шоми имрӯз, 27–уми июн, шурӯъ мешавад ва дар он раисиҷумҳури Тоҷикистон Эмомалӣ Раҳмон ва дигар намояндагони олирутбаи кишвар ширкат хоҳанд кард.

Ин варзишгоҳи навбунёд, ки дар остонаи ҷашни Рӯзи ваҳдат мавриди баҳрбардорӣ қарор гирифт, дорои 25 ҳазор ҷои нишаст мебошад ва интизор меравад, ки ҳамин теъдод меҳмонон аз шаҳри Хуҷанд ҳамчунин аз гушаву канори Тоҷикистон ва меҳмонони хориҷиро барои таҷлили ҷашни Ваҳдат гирди ҳам биёрад. 

Барои бунёди ин маҷмааи варзишӣ беш аз 35 миллион сомонӣ, ҳудуди 10 миллион доллари амрикоӣ, сарф шудааст.

Имрӯз ҳамчунин дар дигар шаҳру навоҳии кишвар ба муносибати солгарди Рӯзи ваҳдат маъракаву намоишҳои идона баргузор шуд. 

Дар шаҳри Душанбе дар Рӯзи ваҳдати миллӣ барномаи вижаи идона роҳандозӣ нашудааст. Вале иддае аз мардум дар боғу фароғатгоҳҳои пойтахт ҷамъ омаданд ва бо сайругашти дастҷамъӣ алоқаи худро ба Рӯзи ваҳдат ва сулҳ нишон доданд.

«Озодӣ»