БОЗДОШТИ ЯК ХАБАРНИГОРИ НАШРИЯИ "ASIA-PLUS"

Маъмурони пулис Шӯҳрат Шодиев, як хабарнигори нашрияи "Asia-Plus"-ро, дар яке аз хиёбонҳои шаҳри Душанбе боздошт кардаанд. Ба гуфтаи масъулони нашрия, оқои Шодиев ҳангоме боздошт шудааст, ки дар истгоҳе дар маҳаллаи маъруф ба "Профсоюз" истода буд.

Маъмурони пулис дар як амалиёти гирудор ё, ба истилоҳ "облава" ӯ, ва чанд нафари дигар аз шаҳрвандонро, ки риш доштанд, бо худ ба яке аз шӯъбаҳои пулиси ноҳияи Сино бурдаанд. Оқои Шодиев аз он ҷо бо телефуни ҳамроҳ ба сардабирони нашрияе, ки бо он ҳамкорӣ мекунад, тамос гирифта, вале баъдан маъмурони пулис тамоси ӯро қатъ кардаанд. Олга Тутубалина, яке аз масъулони нашрияи русизабони "Asia-Plus" ба Би-би-сӣ гуфт, ки ин ҳафтанома вакили мудофеъеро барои ҳимоят аз ин рӯзноманигор ба идораи пулис фиристодааст.

Манобеъи пулис ҳануз дар ин бора ибрози назаре накардаанд. Муҳаммадҷон Назриев, яке аз масъулони дафтари матбуъотии Вазорати кишвари Тоҷикистон, ба Би-би-сӣ гуфт, ки дар ин бора таҳқиқ ва сипас ибрози назар хоҳад кард. Шӯҳрат Шодиев дар тобистони соли 2009 ба ҳангоми сафар бо қатор Клик дар Ӯзбакистон низ боздошт ва барои муддате дар боздоштгоҳе дар он ҷо ба сар бурда буд.

Он замон хабаргузории "Asia-Plus" аз қавли Ҳайдар Шодиев, бародари оқои Шодиев, навишта буд, ки мақомоти ӯзбак ӯро ба занни "ворид кардани аслиҳа ва адабиёти мамнӯъа ба ин кишвар" боздошт кардаанд. Тибқи ин хабар, оқои Шодиев он замон аз сафаре ба Чеченистон бармегашт ва дар Ӯзбакистон барои он боздошт шуд, ки дар кӯлбораш нашрияҳои тоҷикӣ, китоби Қуръон ба забони русӣ ва кутуби дигаре, ки дар китобхонаи шаҳри Грозний харида буд кашф шуд.

Ин рӯзноманигори тоҷик тақрибан як моҳ дар Ӯзбакистон таҳти боздошт буд ва дар авоили моҳи сентябри соли 2009 бар асоси қонуни афве, ки дар робита бо рӯзи истиқлоли он кишвар эълом шуд, маъоф шуда ва ба Тоҷикистон баргашт.

"МамнӮъияти доштани риш"

Зимнан, тайи моҳҳои ахир доштани риш ба мавзӯъе баҳсбарангез дар ҷомеъаи Тоҷикистон табдил шудааст. Дар гузашта аз мавориди боздошт ва озору азияти афроди ришдор дар маҳаллоти мухталифи ин кишвар гузориш шудааст. Абдураҳим Қаҳҳоров, вазири умури дохилии Тоҷикистон, дар моҳи ноябр дар як нишасти матбуъотӣ мавориди боздошти афроди ришдор тавассути пулисро рад кард.

Аммо вай гуфт маъмурони пулис аз чунин афроде хоҳиш кардаанд, ки сурати худро бо аксҳояшон дар шиносномаҳояшон, ки маъмулан бидуни риш аст, мутобиқ созанд. Вай гуфт: "Бештари афроди ришдор дар шиносномаҳояшон аксҳои бидуни риш доранд, ки дар натиҷа маъмурони пулис наметавонанд ҳувияти онҳоро ташхис бидиҳанд."

Пештар, аз вилояти Хатлон низ гузориш шуда буд, ки маъмурони гумрук ва марзбонӣ аз сафари иддае аз муҳоҷирони ришдор ба Русия монеъ шудаанд, вале мақомот ин хабаро таъйид накардаанд. Дар тобистони гузашта, Вазорати маъорифи Тоҷикистон омӯзгорони мактабҳоро дастур дод, ки "беш аз панҷ сонтиметр" риш нагузоранд ва он ҳам танҳо барои устодоне, ки синнашон аз 50 болотар аст. Ба ин тартиб, муъаллимони ҷавон ҳаққи риш гузоштан надоранд.

Бархе гурӯҳҳо бо ишора ба мамнӯъияти гузоштани риш, пӯшидани ҳиҷоб, манъи кӯдакон аз намозгузорӣ дар масҷид ва иқдомот барои бозгардондани иҷбории ҷавонон аз мадориси мазҳабии кишварҳои исломӣ ба Тоҷикистон, давлати ин кишварро ба исломситезӣ муттаҳам мекунанд. Вале мақомоти давлатӣ зимни такзиби ин иддаъоҳо мегӯянд, ки ин иқдомот барои ҷилавгирӣ аз густариши ифротгароӣ ва пайвастани ҷавонон ба гурӯҳҳои ифротгаро ва теруристӣ анҷом мешавад.

Тоҷикистон дар соли ҷорӣ шоҳиди нахустин ҳамлае интиҳорӣ дар шаҳри Хуҷанд, дар шимоли ин кишвар, даргириҳо байни нерӯҳои давлатӣ ва гурӯҳҳои исломгарои мухолифи давлат дар Рашт ва Балҷувон, дар шарқ ва ҷануби ин кишвар, будааст. Мақомоти амниятӣ ва пулис ҳамчунин аз боздошти даҳҳо фарди мазнун ба узвият дар Ҳаракати исломии Ӯзбакистон, як гурӯҳи муртабит бо Алқоъида, гурӯҳҳои мамнӯъаи Ҳизби Таҳрир, Ҷамоъати таблиғ, пайравони ҷараёни Салафия ва ғайра хабар додаанд.