ТАДОБИРИ ШАДИДИ АМНИЯТӢ ДАР ФУРУДГОҲҲОИ ТОҶИКИСТОН

Ба дунболи таркиши Маскав, тадобири амниятӣ дар иншоотҳои муҳими Тоҷикистон низ тақвият ёфтаанд. Маҳмадулло Асадуллоев, сухангӯи Вазорати умури дохилии Тоҷикистон ба Радиои Озодӣ гуфт, бо дастури Абдураҳим Қаҳҳоров, вазири корҳои дохилӣ ва ба хотири таъмини бехатарии фурудгоҳҳо, истгоҳҳои роҳи оҳан ва дигар иншооти стратегӣ, тадобири амниятӣ пурзӯр шудааст.

Тадобири амниятӢ дар фурудгоҳи Душанбе

фурудгохи душанбе Дар фурудгоҳи байналмилалии Тоҷикистон низ пас аз таркиш дар Домодедовои Маскав, барои бехатарии парвозҳо ва амнияти бинои фурудгоҳ, терминал ва дар ҷои буду боши ҳавопаймоҳо, чораҳои иловагии амниятӣ корбаст шудааст. Сухангӯи фурудгоҳи байналмилалии Тоҷикистон Муҳаммадюсуф Шодиев ба Радиои Озодӣ гуфт, аз ҷониби роҳбарияти фурудгоҳ ба Хадамоти амнияти авиатсионии фурудгоҳ дастури махсус дода шуд, ки шароити амниятӣ пурзур карда шавад.

Ва илова бар ин, шӯъбаи умури дохилаи фурудгоҳ низ муваззаф карда шудаст, ки бехатарии мусофирон, дохили бинои фурудгоҳ ҳамаҷониба таҳти назорати амниятӣ қарор дода шавад. Ҳамчунин бо баландгӯяк пайваста ба мусофирон муроҷиат мешавад, ки мувозиби бағоҷи худ бошанд ва агар маводи шубҳанокеро мушоҳида мекунанд зуд огоҳ кунанд.

Тоҷикистон таркишро маҳкум кард

Ба дунболи ҳодисаи мудҳиши таркиши Маскав, мақомоти Тоҷикистон ин ҳодисаро маҳкум намуда расонидани кӯмак ба шаҳрвандони осебдидаи Тоҷикистонро зери назорат қарор додаанд. Эмомалӣ Раҳмон вазири корҳои дохилӣ Абдураҳим Қаҳҳоров ва вазири корҳои хориҷии Тоҷикистон Ҳамрохон Зарифиро вазифадор намудааст, ки ба шаҳрвандони Тоҷикистон мусоидат намоянд.

Раисиҷумҳури Тоҷикистон Эмомалӣ Раҳмон рӯзи сешанбе дар як тамоси телефонӣ ба ҳамтои русаш Дмитрий Медведев изҳори таслият кард. Вазорати умури хориҷии Тоҷикистон низ эълон кард, ки дар таркиши Маскав 16 шаҳрванди кишвар захмӣ ва ду нафар кушта шудаанд. Дар баёнияи расмии вазорат гуфта шудааст, ки Ҷабборов Собир Муҳаммадҷонович ва Ҳақназаров Мурод Худойназарович, сокини ноҳияи Ҷиргатол дар миёни қурбониёни таркиши фурудгоҳи шаҳри Маскав будаанд.

Қаблан Вазорати умури хориҷӣ марги шаҳрвандони Тоҷикистон дар бомбгузорӣ дар фурудгоҳи Домодедоворо таъйид накарда ва гуфта буд, ки ҳанӯз иттилои расмӣ дар ин мавридро аз мақомоти Русия нагирифтаанд. Вазорати умури хориҷаи Тоҷикистон ҳамчунин аз таъсиси як ситоди вижа дар сафорати Тоҷикистон дар Русия хабар додааст. Ин вазорат гуфтааст, ки "як гурӯҳ оҷилан ба ҷои ҳодиса, чанд гурӯҳи дигар ба шифохонаҳои Домодедово, Видное ва шаҳри Маскав фиристода шуданд."