ЭШОНИ НУРИДДИН АЗ ИМОМХАТИБӢ КАНОР РАФТ

Рӯҳонии саршинос Эшони Нуриддин имомхатибии масҷиди "Муҳаммадия"-и шаҳри Ваҳдатро ба бародараш вогузор кард.

Ин рӯҳонӣ, ки дар гузашта барои як "гуфтугӯи дӯстона" ба Кумитаи давлатии амнияти миллии Тоҷикистон даъват шуда буд, масъулияти сарварии масҷиди ҷомеи Муҳаммадияро бар дӯши бародари худ Маҳмудҷони Тӯраҷонзода гузоштааст. Сабаби аз мақомаш канор рафтани Эшони Нуриддинҷонро Ҳоҷӣ Акбари Тӯраҷонзода дар он медонад, ки бародари бузургаш ширкат кардан дар маҷолиси расмиро чандон хуш надорад ва ба ин гуна расмиёт одат накардааст, аз ин рӯ қарор шудааст, ки Маҳмудҷон Тӯраҷонзода вазифаи имом- хатибиро бар дӯш дошта бошад.

Ин иқдом дар ҳоле сурат мегирад, ки ахиран Кумитаи дини Тоҷикистон номгӯи 60 мавзӯъро барои мавъизаҳо ба имом-хатибон пешниҳод кардааст. Дар гузашта бархе аз мавъизаҳои Эшони Нуриддин рӯҳияи шадид ва интиқодӣ касб дошта, даҳҳо навори чунин мавъизаҳо мусодира ва маҳв шудаанд. Эҳтимол меравад, ин рӯҳонӣ нахоста бошад, ба дастури мақомот дар интихоби мавзӯъи сӯҳбатҳои намози ҷумъа итоат кунад.

Аз ин ба баъд Маҳмудҷони Тӯраҷонзода, яке аз дигар аз донишмандони хонаводаи Тӯраҷонзодаҳо масъулияти имомхатибии ин масҷидро ба ӯҳда хоҳад дошт ва бародари аршадаш Эшони Нуриддинҷон ба симмати ноиби хатиби масҷиди ҷомеъи Муҳаммадияи шаҳри Ваҳдат, яъне муовини Маҳмудҷон Тӯраҷонзода фаъолият хоҳад кард. Эшони Нуриддинҷон аз ҷумли воизони маъруфи кишвар аст, ки дар байни мардум аз маҳбубияти хосе бархӯрдор буда мавъизаву гуфторҳои вай ҳаводорони зиёде дорад.

«Озодӣ»

Адреси доимии маводи мазкур: http://www.ruzgor.tj/din/4290-2011-01-28-14-03-14.html