ТАҶҲИЗОТИ “САНГТӮДА-2” ДИГАР АЗ ТАРИҚИ ӮЗБАКИСТОН ВОРИД НАМЕШАВАД

Ширкати “Фароб””-и Эрон, ки ба сохтмони нерӯгоҳи Сангтӯда-2 машғул аст, аз интиқоли коло ва таҷҳизоти худ барои ин нерӯгоҳ аз тариқи Ӯзбакистон даст кашидааст. Ба гуфтаи масъулони ин ширкат, ҳамакнун таҷҳизоти зарурӣ ва маводди сохтмонӣ барои ин нерӯгоҳ тавассути қаламрави Афғонистон ва Чин ба Тоҷикистон ворид карда мешаванд.

Сайид Аскарӣ, масъули намояндагии ширкати “Фароб” дар Тоҷикистон, хабар дод, ки теъдоди мутахассисини эронӣ дар маҳалли сохтмони нерӯгоҳи “Сангтӯда-2” бамаротиб афзоиш ёфта ва васлу насби таҷҳизот акнун ба сурати шабонарӯзӣ сурат мегирад.

Вай афзуд, ки қарор аст дар зудтарин фурсат теъдоди бештаре аз коршиносон аз Эрон ба Тоҷикистон эъзом шаванд. Ширкати эронӣ қасд дорад чархаи нахусти ин нерӯгоҳро дар авоили моҳи сентябр фаъол созад.

Зимнан, Президент Раҳмон ахиран аз ҷониби Эрон дархост карда буд, ки то зимистони имсол нахустин чархаи ин нерӯгоҳро фаъол созад. Сайид Аскарӣ мегӯяд, ки тибқи қарордод бо давлати Тоҷикистон, замони фаъол сохтани чархаи нахустин моҳи феврали соли 2012 таъйин шудааст.

Вай афзуд: “Гузашта аз ин, соли гузашта ҳудуди чаҳор моҳ колоҳо ва мавод барои нерӯгоҳи “Сангтӯда-2” дар қаламрави Ӯзбакистон масдуд шуд. Ба ин тартиб, мо бояд чархаи нахустинро дар тобистони соли оянда фаъол созем. Вале ҳоло мо талош дорем, ки то моҳи сентябр ба ин ҳадаф бирасем ва ба ин далел теъдоди изофии мутахассинро ба Тоҷикистон эъзом кардем.”

Оқои Аскарӣ афзуд, ки ҷониби Эрон тасмим гирифтааст, ки бо таваҷҷӯҳ ба эҳтимоли дубора масдуд шудани таҷҳизоти ин нерӯгоҳ дар қаламрави Ӯзбакистон, мавод ва таҷҳизоти заруриро тавассути қаламрави Афғонистон ва Чин ба Тоҷикистон ворид созад.

Дар моҳи марти соли ҷорӣ ширкати “Фароб” ночор шуда буд, ки бархе аз таҷҳизоти зарурӣ барои нерӯгоҳи “Сангтӯда-2”-ро тавассути ду ҳавопаймои борбар аз Эрон вориди Душанбе кунад. Сайид Аскарӣ ҳамчунин хабар дод, ки бештари аҷзои ҷудогонаи чархаи нахусти нерӯгоҳи “Сангтӯда-2” ба Тоҷикистон ворид карда шудаанд.

Вай гуфт: "Чархаҳои “Сангтӯда-2” ба гунаи чархаҳои нерӯгоҳи Норак ва ё Сангтӯда-1 нестанд. Ин чархаҳо аз панҷ қисм иборат ҳастанд ва дар Тоҷикистон ба ҳам насб карда мешаванд."

Зимнан, тибқи қарордоди миёни ширкати “Фароб” ва давлати Тоҷикистон, нерӯгоҳи “Сангтӯда-2” бо ҳазинаи 180 милюн дулор тавассути Эрон сохта мешавад ва тӯли 12,5 соли баъд аз фаъол шуданаш, ин нерӯгоҳ дар ихтиёри ширкати “Фароб” қарор хоҳад дошт.

Сайид Аскарӣ мегӯяд, ки ба ин далел онҳо ба ҳарчи зудтар фаъол сохтани ин нерӯгоҳ алоқаманд ҳастанд, то тавонанд сареъан махориҷи худро бозпас бигиранд. Зимнан, мақомоти Тоҷикистон ва Эрон таъаҳҳуд кардаанд, ки баъд аз анҷоми сохтмони нерӯгоҳи “Сангтӯда-2”, ширкати “Фароб” ба таҳия ва сохтмони нерӯгоҳи “Айнӣ” дар водии Зарафшон, дар шимоли Тоҷикистон, оғоз кунад.

Дар ҳамин ҳол, рӯзи гузашта Алиасғари Шӯърдӯст, сафири Эрон дар Тоҷикистон дар ҷараёни як мизи гирд аз таъвиқ дар роҳандозии телевизиюни муштараки кишварҳои форсизабони Афғонистон, Тоҷикистон ва Эрон изҳори нигаронӣ кардааст.

Ба гуфтаи сафири Эрон, омили аслии таъвиқ ба ҷониби Тоҷикистон рабт доштааст. Вай гуфт, ки то ҳол сохтмони ин телевизиюн, ки дафтари марказии он дар Душанбе қарор хоҳад дошт, омода нашудааст ва масъулини Кумитаи родию ва телевизиюни Тоҷикистон иҷозаи насби таҷҳизотро ҳам надодаанд.

Ҳамчунин, ҷониби Эрон аз давлати Тоҷикистон ва ширкати “Сомон Эйр” барои интиқоли таҷҳизоти ин телевизиюн аз Олмон ба Душанбе хостори кӯмак шуда, вале ҷониби Тоҷикистон ин дархостро нодида гирифтааст. Оқои Шеърдӯст бо изҳори таассуф гуфтааст, ки аз кундии иҷрои ин тарҳ дар Тоҷикистон хаста шудааст.