ТОҶИКИСТОНРО БА НАМОИШГОҲИ "АГРО- 2021" ДАЪВАТ КАРДАНД
7 июли соли 2021 Консули генералии Ҷумҳурии Тоҷикистон дар шаҳри Екатеринбург Зафар Сайидзода бо муовини вазири кишоварзии вилояти Челябински Федератсияи Россия Инна Подшивалова мулоқот кард.
Ҳини мулоқот ҷонибҳо вазъи кунунӣ ва дурнамои ҳамкориҳои байниминтақавиро дар арсаҳои кишоварзӣ ва туризм бар пояи санадҳои мавҷудаи марбута муфассалан арзёбӣ намуданд. Дар ин пасманзар таваҷҷуҳи ҳамсуҳбатон ба мавзӯи марбут ба бузургтарин намоишгоҳ-ярмаркаи агросаноатӣ дар минтақаи Урал таҳти унвони «Агро-2021», ки қарор аст дар шаҳри Челябинск 19-21 августи соли 2021 бо иштироки Губернатори вилояти Челябинск ва намояндагони муассисаҳои махсусгардонидашудаи федералии Россия баргузор шавад, равона гардид.
Инна Подшивалова дар ин иртибот ҳайати Тоҷикистонро аз ҷумлаи намояндагони доираҳои расмӣ ва соҳибкорӣ даъват кард, ки ба "Агро-2021" ташриф оварда, бахши миллии кишварашонро дар ин намоиш-ярмарка ба маърази тамошо гузоранд. Таъкид гардид, ки имсол дар «Агро-2021» масъалаҳои асосии мубоҳиса робитаҳои тиҷорати хориҷӣ ва содирот хоҳанд буд.
Дар мубодилаи афкору пешниҳодот сардори Раёсати Вазорати кишоварзии вилояти Челябинск Игор Ворожцов, директори иҷроияи Ассотсиатсияи созмонҳои мунисипалии вилояти Челябинск "Горный Урал" Александр Решетов ва раиси ноҳияи мунисипалии Катав-Ивановский Николай Шиманович фаъолона ширкат варзиданд.