Таъсиси гӯшаи Исомиддин Соатов дар Китобхонаи миллӣ

Гӯшаи китобхонаи шахсии доктори илми тибб Исомиддин Соатов дар Китобхонаи миллӣ боз шуд.

Тавре ба "Рӯзгор" аз дафтари матбуотии китобхона иттилоъ доданд, ин гӯша дорои бештар аз 3 ҳазор китоб ва дастурамалҳое мебошад, ки ахиран оилаи Соатов ба китобхона тақдим намудааст. Дар маросими эҳдои китобҳо фарзандон, хешовандон, дӯстону ҳамкорон ва донишҷӯёни донишгоҳи тиббӣ ширкат карданд ва ҳамзамон шаби хотираи олими маъруф доир шуд.

Доктори илми тибб, профессор Исомиддин Соатов соли 2006, дар остонаи 63-умин солгарди ҳаёташ аз олам даргузашт. Марҳум саҳми боризе дар рушди дандонпизишкӣ гузошта, муаллифи бештар аз 170 кори илмӣ, аз ҷумлаи ду монография, ду китоби дарсӣ, чор дастурамали таълимӣ, ду луғати русӣ-тоҷикӣ ва русӣ-тоҷикӣ-форсӣ-инглисӣ ва чор тавсияномаи методӣ мебошад. Машҳуртарин китоби ӯ "Бемориҳои дандон ва равишҳои муолиҷаи он" аз беҳтарин китобҳои дарсӣ барои донишҷӯёни донишгоҳҳои тиббӣ арзёбӣ мешавад.