Нимпайкараи Айтматов ва Фирдавсӣ дар китобхонаи Рудомино
Рӯзи 24-уми октябри соли равон дар китобхонаи адабиёти хориҷии ба номи М.И.Рудоминои Маскав нимпайкараи адиби шинохтаи қирғиз Чингиз Айтматов гузошта мешавад. Дар ин бора РИА новости истинодан ба сафорати Қирғизистон дар шаҳри Маскав хабар дод.
Пайкара аз ҷониби ҳайкалтароши машҳури рус Георгий Франгулян офарида шуда, дар галереяи пайкараҳои адибон ва ходимони ҷамъиятии китобхонаи ёдшуда боз мешавад. То ба имрӯз дар ин боргоҳи адаб барои шахсиятҳои таърихие чун Чарлз Дикенс, Иоанн Павели II, Леонардо да Винчи, ҳаким Фирдавсии Тӯсӣ ва дигар фаъолони фарҳанги ҷаҳон нимпайкараҳои ёдгорӣ гузошта шудааст.
Чорабинии мазкур ба ифтихори 85-умин солгарди таваллуди адиби оламшумул бахшида шудааст ва гуфта мешавад, ки аввалин нимпайкараи адиб дар хориҷ аз кишвараш мебошад.
Дар барномаи таҷлили солгарди адиби машҳур ҳамчунин намоиши филми ҳуҷҷатии “Қирғизфилм” бо номи “Шӯҳрати ҷаҳонии Чингиз Айтматов”, намоиши китобҳои адиб, ки бо забонҳои халқҳои олам тарҷума шудаанд ва филмҳои ҳунарие, ки аз рӯи асарҳои ӯ офарида шудаанд, дар назар дошта шудааст. Моҳи декабр бошад дар китобхонаҳои дигари Маскав шабҳои адабӣ, мулоқот бо адибон ва конфронсҳои хонандагон доир ба эҷодиёти нависанда роҳандозӣ мешавад.