Аз Берлин то Душанбе: Ҳайати тиҷоратии Олмон бо технологияҳои нави коммуналӣ ва саноатӣ ба Тоҷикистон меояд

Рӯзгори орому осоиштаи сокинони кишвар ва рушди устувори шаҳрҳо бевосита ба сифати хизматрасониҳои коммуналӣ, навсозии хоҷагии манзил ва таъмини амнияти корхонаҳои саноатӣ вобастагӣ дорад. Тоҷикистон дар ин самт ҷуғрофияи шарикони худро фарохтар карда, барои ҷалби технологияҳои пешрафтаи Олмон қадамҳои ҷиддӣ мегузорад.

Сафири Фавқулода ва Мухтори Ҷумҳурии Тоҷикистон дар Ҷумҳурии Федеративии Олмон Имомуддин Сатторов бо намояндагони ширкатҳои азими технологии ин кишвар — VERTEX GmbH, LAMPE GmbH ва Honeywell мулоқоти созанда ва истисноӣ анҷом дод. Меҳвари асосии ин гуфтугӯҳо ворид намудани инноватсияҳои аврупоӣ ба бахшҳои калидии рӯзгори мо маҳсуб мешавад.

Навсозии хоҷагии манзилию коммуналӣ ва нафту газ

Тавре ки аз Сафорати Ҷумҳурии Тоҷикистон дар Ҷумҳурии Федеративии Олмон хабар доданд, дар ҷараёни музокирот дурнамои ҳамкориҳои мутақобилан судманд дар соҳаҳое баррасӣ шуданд, ки мустақиман ба иқтисодиёт ва шароити зиндагии шаҳрвандон таъсир мерасонанд:

- Ҷорӣ кардани технологияҳои муосири идоракунии шаҳрӣ ва инфрасохтори коммуналӣ;

- Муҳофизати техникии ҷойҳои корӣ ва пешгирии хатарҳо;

- Ҷалби сармоя ва таҷҳизоти насли нав барои коркарди ашёи хом.

Коршиносон бар ин боваранд, ки таҷрибаи ширкатҳои олмонӣ, бахусус дар бахши автоматизатсия ва бехатарии Honeywell, метавонад сифати хизматрасониҳои шаҳриро дар Тоҷикистон ба куллӣ тағйир диҳад.

Идомаи муколама дар Душанбе

Яке аз натиҷаҳои муҳим ва амалии ин нишаст он буд, ки ҷониби Олмон барои идомаи ин муколамаи созанда изҳори омодагии комил намуд.

Ба зудӣ сафари ҳайати тиҷоратии ширкатҳои Олмон ба шаҳри Душанбе сурат мегирад. Ин сафар заминаи воқеиро барои имзои шартномаҳои нав, таъсиси корхонаҳои муштарак ва ворид намудани стандартҳои баландтари сифат ба рӯзгори иқтисодии кишвар фароҳам меорад.

“Рӯзгор”