Имзои ёддоштҳои табодулӣ миёни Тоҷикистон ва Ҷопон
Ҳукумати Ҷумҳурии Тоҷикистон ва Ҳукумати Ҷопон бо имзои ёддоштҳои табодулӣ ду тарҳи бунёдии таҷдиди роҳҳоро ниҳоӣ карданд. Қарор аст ҳамкорӣ барои таҷдиди роҳи мошингарди Душанбе-Бохтар, қитъаи Қизилқалъа-Бохтар дар ду марҳила сурат бигирад.
Дафтари матбутии Вазорати умури хориҷии Тоҷикистон иттилоъ дод, ки 20 августи соли равон дар Вазорати корҳои хориҷӣ маросими мубодилаи ёддоштҳо байни Ҳукумати Ҷумҳурии Тоҷикистон ва Ҳукумати Ҷопон оид ба лоиҳаҳои «Таҷдиди роҳи мошингарди Душанбе-Бохтар, қитъаи Қизилқалъа-Бохтар» (марҳилаи якум, корҳои лоиҳакашӣ) ва «Таҷдиди роҳи мошингарди Душанбе-Бохтар, қитъаи Қизилқалъа-Бохтар» (марҳилаи дуюм, корҳои сохтмонӣ) баргузор гардид.
Ёддоштҳои табодулӣ аз ҷониби Вазири корҳои хориҷии Ҷумҳурии Тоҷикистон Сироҷиддин Муҳриддин ва Сафири Фавқулода ва Мухтори Ҷопон дар Ҷумҳурии Тоҷикистон Ҳаҷиме Китаока ба имзо расиданд.
«Рӯзгор»